«Тіл - мемлекеттіліктің негізі» тақырыбында дөңгелек үстел өткізілді
Қазақстан Республикасының Тәуелсіздік күні мерекесіне орай «ҚТЖ-Жүк тасымалы» ЖШС-нің ұйымдастыруымен ағымдағы жылдың 4 желтоқсанында «Тіл - мемлекеттіліктің негізі» тақырыбында дөңгелек үстел өткізілді. Дөңгелек үстелге Қазақстан Республикасы Парламенті Сенатының депутаты Геннадий Шиповских, Компанияның басшылары мен қызметкерлері қатысты.
Дөңгелек үстелдің негізгі мақсаты - мемлекеттік тілді дамыту мен оны ілгерілету бойынша өзекті мәселелерді талқылау, мемлекеттік тілдің ұлт бірлігін нығайтудағы рөлі мен маңызын насихаттау және қызметкерлер арасында қолданыс аясын кеңейту.
Іс-шараны «ҚТЖ-Жүк тасымалы» ЖШС Бас директорының корпоративтік мәселелер жөніндегі орынбасары Владимир Бабиченко кіріспе сөзбен ашып, өзі күніне кемінде он сөз үйренетіндігін үлгі ретінде айтып, мемлекеттік тілге ерекше құрметін сездірді. Депутат Геннадий Шиповских қарапайым теміржолшы бола жүріп, мемлекеттік тілді білуінің арқасында зор жетістікке жетуге болатынын, Компания қызметкерлері Константин Цой мен Ксения Гартман мемлекеттік тілді жетік меңгергендерін, тіл үйренудегі тәжірибелерімен бөлісіп, «ҚТЖ» ҰК» АҚ қызметкерлері Ақмарал Байғабылова мен Ербол Тоқтағазы мемлекеттік тілдің қолданыс аясын кеңейтудегі мәселелер мен кедергілер және оларды шешу жолдары жөнінде ұсыныс-пікірлерін ортаға салды.
Кеш көрігін күмбірлеген күйдің үні аша түсіп, көрермендер арасында Отан және теміржол тарихына қатысты қазақша «QUIZ»зияткерлік ойынымен қорытындыланды.
